Biba "Op Kamer"

Hopi di boso sigur ta pensa: “Biba hunto cu hende straño den un cas? Esey mi no kier! Mi kier tin mi mesun kamber, baño y cushina.”

Como studiante sigur den e prome aña na Hulanda bo no tin mucho escogencia. Tin un gran necesidad pa kambernan na Hulanda. Hasta studiantenan Hulandes mes no ta haya facilmente un kamber. Ni di papia di un studio of apartamento!

E grupo di studiantenen Arubiano ta un grupo relativamente chikito cu den e lunanan di juli y augustus ta biaha pa Hulanda pa sigui un estudio eynan. Sin embargo mester tene cuenta cu no ta solamente for di e islanan di Caribe tin studiante ta biaha pa bay biba na Hulanda, tambe for di hopi otro pais di Europa. Bo mester tene cuenta pues cu hopi otro studiante tambe ta buscando un luga pa biba.

For di Aruba ta hopi hopi dificil, casi imposibel pa regla un kamber na Hulanda. Pa e motibo ey nos ta traha cu un intermediario kende ta bay busca activamente pa un kamber y asina ya prome cu bo yega Hulanda bo tin un kamber caba. Pero mas importante aun, un adres na unda bo por inscribi bo mes na e municipio (gemeente).

Dicon inscripcion na un adres ta importante?

Na momento di inscripcion bo ta haya un BSN-nummer. E number BSN ta nifica number di ciudadano pa servicio. E ta un number unico pa e ciudadano y cual number ta necesario por tin contacto cu departamentonan gubernamental. Cu e number BSN bo ta regla e.o. bo peticion pa DigiD, habri un cuenta na banco y otro asuntonan practico.